Тит-Арынская сельская библиотека- филиал №16

Информация о материале: Автор: Super User

Аймах көрсүһүүтүн оҥорор баҕа санаалааҕа...

2025 сыл бүтүн дойдубут Россия үрдүнэн "Аҕа дойдуну көмүскээччилэр" , Саха Сирин үрдүнэн "Ийэ дойду" комүскээччилэр сылларынан биллэриллибитэ .

Тиит-Арыы ыччаттара дойдуларын көмүскэлигэр "анал байыаннай дьайыыга" ытык иэстэрин хорсуннук толоро сылдьаллар. Кинилэр хорсун сырыылара кэлэр кэнчээри ыччакка кэпсээн, үтүө холобур буоллун диэн Бүтүн Россия үрдүнэн ыытыллар тэрээһиннэргэ бары биир санаанан , көлүөнэни ситимниир соруктаах-сыаллаах араас тэрээһиннэри ыытабыт .

Тиит Арыы бөһүөлэгэр олохтоох библиотекаҕа ,Эрхан Саввин сырдык аатыгар анаммыт ,аҕата Ариан Николаевич уола олорбут сырдык ,кылгас олоҕун сырдатан хомуйбут матырыйаалларынан , Эрхан бойобуой сырыыларын көрдөрөр ,доҕотторун ,бииргэ сулууспалаабыт бойобуой табаарыстарын ,аймахтарын хаартыскаларынан ,ахтыыларынан дириҥ ис-хоһоонноох Эрхааммыт олоҕун кэпсиир быыстапка турда. 2 Байаҕантай айар куттаахтарын бастыҥ хоһоонньута Валентина Егорова -Дойдууна Эрхан сырдык аатыгар суруйбут , "Киэн тутта ааттыыбыт" диэн хомуурунньукка киирбит хоһоонун ааҕан иһитиннэрдэ.

Саввин Эрхан Арианович бэһис гаубичнай самоходнай артиллерийскай батарея хамандыыра, иккис гаубичнай самоходнай артиллерийскай дивизион 69647-с нүөмэрдээх байыаннай чаас, гвардия младшай сержана Эрхан Саввин – “Якут” , байыаннай дьайыы кыттыылааҕар байыаннай эпэрээссийэ кэмигэр ураты хорсун дьоруойдуу быһыытын иһин "Жуков" мэтээлининэн ,онтон өлбүтүн кэннэ "Хорсун быһыы орденынан"наҕараадаламмыта.

Аҕа дойду сэриитин кэмигэр аатырбыт Улуу маршал, полководец Георгий Константинович Жуков аатынан мэтээл уйан-хатан биллэр уустук бойобуой киирсиилэргэ уһулуччу хорсун быһыыны оҥорбут байыаннайдарга тиксэр улахан суолталаах наҕараада.

Эрхан аҕата Ариан Николаевич уолун ахтан -санаан " Байыаннай дьайыы бүттэҕинэ элбэх баҕа санаалааҕын хото эппитэ. Ол бүтэһик кэпсэтиибитигэр эбээтин көлүөнэтин өттүттэн оҕолорун, сиэннэрин, аймахтарын барыларын мунньан, улахан аймах көрсүһүүтүн оҥоруон баҕарар бүччүм санаалааҕын кэпсээбитэ. Бу санаатахха, үөһэттэн этиттэрбит эбит…Эбээтигэр кэтэһиилээх бастакы сиэнэ, оҕоттон эрэ чорботуллан, ордук-хос атаахтаабыт мааны, тапталлаах оҕото буолан, эбээтин ис-иһиттэн таптыыра. Ол иһин эргиллэн кэллэҕинэ, эбээтин дьиэтин холлоҕоһун ситэрэр улахан баҕалааҕын ол онно эппитэ.

Эбээм Лугинова(Саввина) Евдокия Николаевна дойдутугар Тиит Арыыга хайаан да тиийиэм, аймахтарбын барыларын кытта чугастык билсиэм, сибээһи олохтуом диэхтээбитэ… Тоҕо эрэ онно ис-иһиттэн арыллан, инники былааннарын миэхэ кэпсээбитэ, наһаа да чугастык кэпсэппиппит…», — сонньуйа кэпсээтэ.

Аҕатыгар Ариан Николаевичка "Саллаат Аҕата" диэн уопсастыбаннай билинии мэтээлин туттарбыттара ,уолун соҕотоҕун иитэн-такайан таһаарбыт ,Ариан Николаевич кылаата улахан. Бу мэтээлинэн анал байыаннай дьайыыга ураты хорсун быһыыны көрдөрбүт оҕолоох Аҕаны наҕараадалыыллар.

Манна мустубут оскуола оҕолоро ,улахан дьон бу тэрээһини бары олус долгуйан ,сонньуйан иһиттибит ,хорсун буойуттарбытынан киэн туттабыт, кэнчээри ыччатарга куруук кэпсиир, билиһиннэрэр эбээһинэстээхпит.

Үтүө киһи аата үйэлэргэ ааттанан кинигэ буолан тахсарын истэн , олус хайҕабыллаах дьыала -,диэн үөрэ иһиттибит. Кини сырдык аатын , аймахтара ааттатыахтара, ситэ олорботох олоҕун салгыахтара. Анал байыаннай дьайыыга сырдык тыыннарын толук уурбут уолаттарбыт тустарынан биир дойдулаахтарыгар кэпсиир уонна сурукка тиһэн хаалларар, үйэтитэр ытык иэстээхпит.

Подробнее: Аймах көрсүһүүтүн оҥорор баҕа санаалааҕа...

Информация о материале: Автор: Super User

Оҕолорго сайыҥҥы

"Ааҕыы лааҕыра"

үлэтин саҕалаата

Кинигэ киһиэхэ дириҥ билиини биэрэр, хас биирдии киһи истиҥ доҕоро, өйдөөх сүбэһитэ буолар.

Тиит-Арыытааҕы А.И. Турантаев аатынан олохтоох библиотека сылын ахсын , сайын оҕолорго анаан "Ааҕыы лааҕырын" үлэлэтэр. Быйыл лааҕырга 14 оҕо сылдьар ,саастарыттан тутулуга суох ,2 группаҕа арахсан ыам ыйын 26 күнүттэн , бэс ыйын 7 күнүгэр диэри үлэлиибит. Оҕолор үөрэ-көтө "Кинигэ күүһэ" диэн акцияҕа төрөөбүт түөлбэлэрин 2 Байаҕантай историятын , үһүйээннэрин кэпсээн быйылгы лааҕырбыт үлэтин саҕалаата.

Оҕолорго анаан библиотека саамай активнай ааҕааччылара Тиит-Арыы оскуолатын 8 кылааһын үөрэнээччитэ, Аргунов Власий , 7 кылаас үөрэнээччитэ Карина Аргунова 5 түһүмэхтээх оонньууну тэрийэн; боппуруоска эппиэттээһиннээх ,мээчигинэн оонньуулардаах , көрдөөх сүүрүүлээх-көтүүлээх , суруйааччылары энциклопедияттан булуу ,мүнүүтэҕэ ааҕыы курдук күрэхтэргэ оонньотон , оҕолор минньигэс амтаннаах аһынан күндүлэнэн, анал аат сертификаттарын наҕараадаланан , лааҕырдарын үлэтин арыйдылар.

. "Кинигэ күүһэ" акцияҕа Альбина Дмитриевна Константинова "Чуораанчык" оҕо

саадыгар кырачааннарга "Үс эһэ "диэн остуоруйаны кэпсээн , оҕолор олус болҕомтолоохтук , остуоруйа дойдутугар сылдьан , чуумпуран иһиттилэр. Оҕолорго барыларыгар "Анал бириис" туттаран кырачааннар үөрүүлэрэ үгүс ,кинигэ ,сурунаал көрдөрдүбүт. Оҕолор дьиэлэригэр уларсан, ийэлэригэр ,аҕаларыгар аахтара кэпсэттэрэ бардылар.

Оҕону ааҕыыга көҕүлүүр, ааҕар баҕатын уһугуннарар сыаллаах,оҕо саҥарар, кэпсиир дьоҕура сайдарын туһугар билбитин көмүскээн кэпсэтии, айылҕаны таптыыр, харыстыыр, - бу маннык сыаллаах соруктаах сайыҥҥы лааҕыр утумнаахтык үлэтин саҕалаата.