Мин мантан сэриигэ барбытым... 
Былыр Танданан Кулун Куойа үрэҕинэн Дьоккуускайтан Өймөкөөннүүр аккыырай суола ааһара .Бу манан Өймөкөөн аатырбыт атыыһыттара Кривошапкин оҕонньор эр дьоно таһаҕас тиэйэн ааһан истэхтэринэ ,Николай Атласов Өймөкөөн ,Тарыҥ үрэх диэн сир олохтооҕо ыалдьан хаалан хаалбыт .Бу улаханнык ыалдьыбыт киһини Уус-Алдан үтүө санаалаах дь
оно ,көрөн -харайан үтүөрдүбүттэр .Степан Охлопков :"Мин дьонум көрбүттэрэ", -диир буолара.Бу киһи Байаҕантай улууһун кииниттэн Баайаҕаттан Анна Васильевна Андросованы кэргэн биир кыыһы ,үс уолу төрөтөн баран ,эдэр сааһыгар ыалдьан өлбүт.Кыыстара Марфа Николаевна сут дьыл сүөһү аһата Уус Таатта диэн сиргэ кыстыы олорон ,Денис Андреевич Данилов диэн киһиэхэ кэргэн тахсан икки уолу төрөтөр. Уолаттар 2 Байаҕантай нэьилиэгэр ,Туойдаах үрэҕэр ,Куру-Дьири диэн сиргэ төрөөбүттэрэ. Бу үс туруу дьон оччотооҕу олоххо үлэлии хамсыы сылдьан Аҕа дойду Улуу сэриитигэр баран өлбүттэр. Улахан уол Роман кэргэннэнэн икки кыыс оҕону төрөтөн хаалларар.Роман 1903 сыллаахха төрөөбүт ,1942 сыллаахха алтынньыга сэрии толоонугар охтубут ,Тверскэй уобалас Кировскай оройуонун Б.Иваново дэриэбинэтигэр көмүллүбүт. Иван 1912 сыллаахха алтынньыга төрөөбүт.1942 сыллаахха сэрии толоонугар охтубут ,көмүллүбүт сирэ биллибэт . Пантелеймон 1914 сыллаахха төрөөбүт ,сэрии толоонугар 1943 сыллаахха атырдьах ыйыгар охтубут ,Калужскай уобалас ,Милеево диэн сиргэ көмүллүбүт. Ийэлэрэ Анна Васильевна 1946-47 сс тиийэ уолаттарын киэһээ ахсын ороннорун оҥоро-оҥоро күүтэрэ үһү."Мин уолаттарым дьонтон итэҕэһэ суох дьон этилэр ,биирдэрэ эмэ кэлээрэй ",-диэхтиирэ үһү. 
1946-47 сс кыыһа уонна күтүөтэ эмээхсини Уус Таатта Кырамдатыгар көһөрөн аҕалбыттара.Роман улахан кыыһыАграфенаны ,оскуолаҕа киирэ илик саастаах оҕону эмиэ аҕалбыттар.Кыра кыыс Анна ийэтигэр хаалбыт. Убайдарым таайдара ,эдьиийдэрэ Марфа Николаевнаҕа ыыппыт үс муннуктаах суруктарын арыйбыттарыгар ,сурук иһиттэн кумах тохтубутун ,ол кумаҕы Ийэтэ хомуйан ылан былаатын муннугар баайбытын өйдөөн хаалбыт .Сурук ис хоһоонун эмиэ өйдүүр."Өстөөх үс атаакатын тохтоттубут ,бу сырыы быһаарыылаах буолуохтаах ....",-диэн этиитэ өргө диэри кэпсэнэрэ,ити кэнниттэн сурук кэлбэтэх...
Бу суруктартан сиэттэрэн убайым Денис Данилов 60-с сылларга саха ыччатын ыллаппыт мелодист " Мин мантан сэриигэ барбытым" диэн ырыаны айбыта .Бу ырыа өр ылланыа ,бу ырыаны иһиттэргит эрэ ,Атласовтар тустарынан санаан ааһар буолуҥ. Ыарахан олоҕу тулуйан ,хаһан да тиийиммэт колхуостаах олоҕор муомура улаатан дьон буолбуппут..
Анатолий Данилов ахтыытыттан ,Уус-Таатта