Константинов  Алексей Дмитриевич-

Мэнигийээн

Биир дойдулаахпыт -

Россия үөрэҕириитин Бочуоттаах үлэһитэ.
- Саха республикатын культуратын туйгуна.
- Саха республикатын үөрэҕириитин туйгуна.
           - Саха республикатын ыччат политикатын туйгуна             

- " Саха- Азия" МДФ лауреата

хоһооннорун билсиһиннэрэбит .

ТУРУЙА ХАҺЫЫТЫН КЫТАРЫ...

Иһиллэр куолакал дуораана...
Умнубат өйдөбүл буоланнар...
Сэриигэ охтубут уоланнар...
Хаалбыттар үйэни туорааннар...

Сахабыт ыалларын аймааннар...
Сэриибит сыллара ааспыттар...
Ыарахан кэмнэри кыйдааннар...
Дьоннорбут бу сиртэн барбыттар...

Туруйа буоланнар кыырайан...
Үөһэнэн эргийэ көтөллөр...
Дууһаны аймыырдыы кыланан...
Үөскээбит алааһы көрөллөр...

Ол уоттаах сэриигэ хаалбыттар...
Эйэлээх кэми аҕалбыттар...
Үөһэттэн көрөллөр кэрэхсээн...
Олоҕу биһиэхэ бэлэхтээн...

Эдэркээн бэйэҕит сүттэххит...
Эмискэ тохтообут сүрэххит...
Өйдөбүл үйэ саас буоллаххыт...
Норуоккут махталын буллаххыт...

Хас биирдии буойуну умнумаҥ...
Ханнык да кэмнэргэ тумнумаҥ...
Туруйа хаһыытын истээриҥ...
Махтал этээриҥ, сүгүрүйээриҥ !!!

Сарсыардааҥы эҕэрдэ...
Көтөн тиийиэхтин эрдэ...
Алгыс тылларын бэрдэ...
Тиийдин эйиигин үөрдэ...

Саҥа күн эһиэхэ аҕаллын...
Саҥа хаар кэриэтэ сырдыгы...
Сүрэххин үөрүүнэн ыллаттын...
Туһаайдын алгыстаах ыллыгы...

Бэйэҕин үөрүүгэ эн сирдээ...
Тулаҕар махтана мичээрдээ...
Саҥа күн үүммүтүн уруйдаа...
Бу кэм кэрэтин уруһуйдаа...

Кэлбит күн кэрэтин көрүөҕүҥ...
Кыраттан даҕаны үөрүөҕүҥ...
Барыта этэҥҥэ буолуохтун...
Биирдиибит үөрүүнү булуохтун..

Ньургуһун хонууну симиирин...
Айылҕа барахсан тиллиитин...
Кэҕэбит кэриигэ этиитин...
Сайыммыт барахсан кэлиитин...

Долгуйа күннэтэ кэтиибин...
Үрүҥ күҥҥэ уунабын илиибин...
Сүрэхпэр ылабын итиитин...
Хоһооммор үөрүүнү тиһэбин...

Үрдүгүөн көҕөрөр халлаана...
Үп -үрүҥ чэпчэки былыта...
Сибиэһэй сиккиэрдээх салгына...
Ураты бу кэмҥэ барыта...

Сааскыбыт сайынныын алтыһар...
Санаабыт кэрэҕэ тардыһар...
Кэрэ кэм үтүөнү ыытыһар...
Тулабар ырыатын ыллаһар.