Гоголев Петр Никатонович ,
Уус-Алдан оройуонун Лөгөй нэһилиэгэр төрөөбүтэ.Аҕа дойду Улуу сэриитин кыттыылааҕа.1942 сыллаахха аармыйаҕа ыҥырыллыбыта. 36 -с аармыйа ,9-с полк ,94 -с стрелковай дивизия сулууспалаабыта,младшай командир курсугар үөрэммитэ.1945 сыллаахха Япония Квантунскай армиятын утары сэриигэ кыттыбыта .
Аҕа дойду сэриитин 2 степеннээх орденынан , элбэх мэтээллэринэн наҕараадаламмыта
Турантаев Николай Ионович , 1921-1988с.Дьуона оҕонньор диэн ааттанар аҕата Байаҕантай нэһилиэгэр Үөһээ Үрэх диэн сир олохтооҕо. Николай Ионович Танда оскуолатын сэттис кылааһын 1936 сыллаахха бүтэрбитэ . Холкуоска хонуу биригэдьииринэн ,кыладыапсыгынан үлэлии сылдьан,1942 сыллаахха аармыйаҕа ыҥырыллыбыта.Японскай милитаризмы утары сэрии кыттыылааҕа, Забайкальскай байыаннай уокурукка 1942 -1946 сыллаахха сулууспалаабыта .61 -с стрелковай саппаас полкатын байыаһа 386 -с стрелковай полкаҕа красноармеец,80-с мотострелковай полкаҕа , 27-с мотострелковай полкаҕа стрелок . 1946 сыллаахха от ыйыгар демобилизациянан дойдутугар кэлбитэ. «Японияны Кыайыы иһин» уонна 6 юбилейнай мэтээллэринэн, «Аҕа дойду сэриитин 2 -степеннээх» уордьанынан наҕараадаламмыта . Дойдутугар 2 Байаҕантай нэһилиэгэр, Тиит- Арыы ,Танда маҕаһыыннарыгар атыылааччынан уонна Танда сельпотугар үлэлээбитэ. 1952 сыллаахха Бороҕоҥҥо көһөн киирэн, промкомбинатка кочегар-машиниһынан , маастарынан үлэлээбитэ. Кэлин Мүрү сельпотугар араас үлэҕэ үлэлиир: завхоз,харабыл ,рабочай.1976 сыллаахха пенсияҕа тахсыбыта,тутуу учаастагар харабылынан 1981 сылга диэри үлэлээбитэ. Кэлин 2-с группалаах инвалид буолбута. Кэргэннээх, оҕолордоох.
Егоров Яков Прокопьевич -1921 сыллаахха ахсынньы ый 21 күнүгэр 2 Байаҕантай нэһилиэгэр төрөөбүтэ. Аармыйаҕа ыҥырыллар диэри 10 сыл холкуоска үлэлээбитэ. 1943 сыллаахха Чурапчы ОВК -нан ыҥырыллыбыта. Бастаан Дарасуҥҥа ,Бурятияҕа сулуспалаабыта. Онтон 76-с строевой батальонна үөрэнэн,1944 сыллаахха Маньчжурия кыраныыссатыгар 1945 сыллаахха Монголия стратегическай суолталаах сибээс линиятын тардыыга, тыылтан, бойобуой быһыыга-майгыга көмөлөһөр чааска 1946 сылга дьиэтигэр кэлиэр диэри үлэлээбитэ. Дьаакып Дьөгүөрэп дойдутугар холкуоска уонунан сылларга биригэдьиирдээн, үлэ түбүгүн этинэн-ханан билбитэ.Тэрийэр дьоҕурунан дьоҥҥо үтүө сыһыанынан сөбүлэппитэ. Нэһилиэк Сэбиэтигэр биэс төгүл депутаттаабыта. 1976-1988 сылга диэри Бороҕоҥҥо Коммунэнерго үлэһитэ.
Николаев Иннокентий Кириллович 1911 сыллаахха төрөөбүтэ. 1970 сыллаахха өлбүтэ. Бу олох үөрэҕэ суох хорсун буойун 2 Байаҕантай нэһилиэгэр төрөөбүтэ.1941 сыллаахха иккис хомуурга атырдьах ыйыгар аармыйаҕа барбыта. Бу нууччалыы «чуорт» да диэни билбэт,үрэх баһыгар төрөөбүт-үөскээбит түҥкүтэх киһи соҕотохто уоттаах сэрии будулҕанын оттотугар баар буола түһэр. Кини түүл-бит курдук сылдьан түбэспэтэҕэр түбэһэн, ханан хайдах сылдьыбытын сулуспалаабыт байыаннай чаастарын босхолоспут куораттарын ааттарын өйдөөн хаалбатаҕа баара буолуо дуо? Арай Ленинград куорат таһыгар сэриилэспитин, ол куорат дьоно былакаадаҕа муҥу-сору көрөллөрүн туһунан истибитин өйдөөн хаалбыт. Онон буоллаҕына, кини Ленинградскай дуу, 2-с Украинскай фроҥҥа сылдьыбыт буолуон сөп.Николаев И.К красноармейскай киниискэтигэр сорох лиистэрэ быстан түспүт. 9-с стрелковай полк, 3-с стрелковай рота байыаһа диэн суруллубут. Маны тэҥэ кини диҥнээхтик сэриилэспитин туох да мөккүөрэ суох чуолкай туоһутунан , уҥа атаҕар кыргыһыыга бааһыран, госпитальга быстарбыта туоһулуур. Ити да кэнниттэн Россия араас госпиталларынан уһуннук эмтэнэн төрөөбүт дойдутутун 1943 сыллаахха сэтинньи ыйга булбут эбит. 1941-1943 сыллар тухары кини өлбүтэ да, тыыннааҕа да биллибэккэ сылдьыбыт. Дьонугар киниттэн биир да сурук сыыһа кэлбэтэх. 1941 сыллаахха холбоспут кэргэнигэр Калининская Аграфена Гаврильевнаҕа төннөн кэлэн, түөрт оҕолонон, охсуспут, көмүскэспит олоҕун күндүтүк, дьолун көрө дьылҕаламмыта. 1 группалаах сэрии инбэлиитэ, бастаан 2 Байаҕантайга , онтон Бороҕоҥҥо киирэн олохсуйан үлэлиир. Бороҕоннооҕу нэһилиэньэни олох-дьаһах өҥөтүнэн хааччыйар комбинат, атах таҥаһын оҥоро сыаҕар саппыкы оҥорооччу маастарынан, кэлин түүҥҥэ харабылынан үлэлээбитэ. Аҕа дойду сэриитин 2 -с истиэпэннээх уордьан кавалера , аҥар атаҕа суох баттыгынан сыдьар,фронтовик, урукку үөрэҕэ суох холкуостаах Ийэ дойдутун Ленинград куораты киһиттэн итэҕэһэ суох сылдьан ,күөнүнэн көмүскээбитэ.
Гоголев П.Н." Бороҕон боотурдара " кинигэтиттэн .