2 Байаҕантайтан 

Үлэ фронугар,промышленноска сылдьыбыттар

1.Атласов Гаврил Афанасьевич.  

Байаҕантай улууhун II Байаҕантай нэһилиэгэр төрөөбүт. 1929 сылтан холкуоска үлэһит буолбут, тимир ууһунан, хонуу үлэһитинэн  сылдьыбыт. Сэрии сылларыгар кыһынын Ааллаах Үүҥҥэ тиийэ таһаҕас таспыт. 1943-1945 сыллардаахха Иркутскай уобалас Черемково куоратыгар сэрии сэбин оҥорор собуокка үлэлээбит. Сэрии кэнниттэн хонуу үлэһитинэн, булчутунан сылдьыбыт. Танда оскуолатыгар хачыгаарынан, харабылынан үлэлээн бочуоттаах сынньалаҥҥа тахсыбыт. «1941-1945 сс. Аҕа дойду сэриитин сылларыгар килбиэннээх үлэтин иһин», Кыайыы 30, 40 сылларыгар үбүлүөйүнэй, «Үлэ бэтэрээнэ» мэтээллэринэн наҕараадаламмыта. Кэргэнэ Атласова Анастасия Софроновна. Танда оскуолатын үһүс кылааһын бүтэрбит. 1934 сылтан холкуос чилиэнэ буолбут. Сир тиэриитигэр, от хомууругар, бурдук быһыытыгар, хонуу үлэтигэр сылдьыбыт. «Ийэ албан аата» мэтээллээх. Кинилэр 9 оҕолоруттан элбэх сиэннээхтэр, хос сиэннээхтэр

2.Атласова Анна Никифоровна.

3.Аргунов Константин Матвеевич

Сэбиэскэй партийнай үлэһит, биэнсийэҕэ тахсан баран Дьокуускайга Саха театрыгар вахтерунан үлэлээбит, икки кыыс оҕолоох.

4.Афанасьев Семен Иванович.

Байаҕантай улууhун II Байаҕантай нэhилиэгэр,  Нуучча алааhыгар Уйбаан Афанасьев-Майалҕан дьиэ кэргэнигэр төрөөбүт. «Бөлөхтөhүү» холкуос чилиэнэ. 1942 сыллаахха үлэ фронугар ыҥырыллыбыт уонна Сангаарга чох хостооhугар үлэлээбит. 1943 сыллаахха шахта сиҥниитигэр түбэhэн өлбүт

5.Готовцев Егор Дмитриевич.

Байаҕантай улууhун Хаҥалас нэhилиэгэр,  Хаптаанньа үрэҕэр төрөөбүт. «Пятилекка» холкуос чилиэнэ, бу холкуос биир бастакы ыстахаанабыhа. 1943 сыллаахха үлэ фронугар ыҥырыллыбыт уонна 1945 сылга диэри үлэлээбит. Дойдутугар кэлэн баран «Пятилекка» холкуоска хонууга, бурдук үлэтигэр үлэлээбит. Кэлин бөдөҥсүтүү  саҕана Бороҕоҥҥо  киирэн араас үлэҕэ үлэлээбит.

6.Готовцев Иннокентий Софронович

1943 сыллаахха үлэ фронугар ыҥырыллан промышленноска  Сунтаарынан ,Кэбээйинэн сылдьыбыт.Сангаарга шахта сиҥниитигэр өлбүт.Кэргэнэ Мария Иннокентьевна ,биир кыыстаахтар Матрена Иннокентьевна  .Матрена Иннокентьевна Бороҕоҥҥо олорбута ,кэргэнэ Филипп Степанович Петров ,3 оҕолоохтор.

7.Догоюков Алексей Евсеевич.

Байаҕантай улууhун Хаҥалас нэhилиэгэр, Чөҥкөллөҕө төрөөбүт. «Тыраҕатталаах» холкуос чилиэнэ. Кэлин «Бөлөхтөhүү» холкуоска таhаарыылаахтык сылгыhыттаабыт. Сэрии сылларыгар фроҥҥа бастакы хомуурга ыҥырыллан баран, доруобуйатынан сыыйыллан үлэ фронугар анаммыт уонна 1941 сылтан  фроҥҥа атаарыллар сылгылары көрөөччүнэн үлэлээбит. 1943 сыллаахха  дойдутугар төннөн кэлэн холкуоhугар үлэлээбит. Бииргэ төрөөбүттэр  уон иккиэлэр, онтон иккитэ уол.

8.Егоров Антон Дмитрьевич.

Байаҕантай улууhун II Байаҕантай нэhилиэгэр, Чулуудаҕа төрөөбүт. «Тыраҕатталаах» холкуос чилиэнэ.  Сахаттан бастакы профессор, биология уонна химия наукаларыгар учуонай буолбут А.Е.Егоров бииргэ төрөөбүт быраата.  Сэрии сылларыгар фроҥҥа ыҥырыллан баран, доруобуйатынан сыыйыллан үлэ фронугар анаммыт уонна 1941 сылтан  фроҥҥа барар дьону хомуйар пууҥҥа үлэлээбит. Кэлин Дьокуускай куоракка промкомбинакка үлэлээбит. 1945 сыллаахха демобилизациянан дойдутугар төннөн кэлэн холкуоhугар үлэлээбит. Кэргэнэ Петрова Мария Константиновна. Үс оҕолоохтор. Антон Дмитриевич 1962 тохсунньу 7 күнүгэр өлбүт.

9.Егоров Николай Дмитриевич

Байаҕантай улууhун II Байаҕантай нэhилиэгэр, Тиилийэҕэ 1884 сыллаахха төрөөбүт. «Бөлөхтөhүү» холкуос чилиэнэ. Сэрии сылларыгар фроҥҥа ыҥырыллан баран, доруобуйатынан сыыйыллан үлэ фронугар анаммыт уонна 1941 сылтан  cылгыhытынан, оробуочайынан үлэлээбит. 1945 сыллаахха демобилизацияҕа түбэhэн, дойдутугар төннөн кэлэн холкуоhугар «Бөлөхтөhүүгэ», кэлин бөдөҥсүтүү кэнниттэн Партизан Егоров аатынан холкуоска хонуу үлэтигэр  үлэлээбит. Кэргэнэ Неустроева Дария Афанасьевна. Тоҕуста оҕоломмуттарыттан кыыстаах уол тыыннаах хаалан элбэх сиэннээхтэр, хос сиэннээхтэр, хос-хос сиэннээхтэр.

10.Егоров Прокопий Никифорович 

Байаҕантай улууhун II Байаҕантай нэhилиэгэр,  Лабыктаҕа төрөөбүт. Танда оскуолатыгар ситиhиилээхтик үөрэммит. Бастыҥ общественник, комсомолец, хоhоон суруйар, хаhыакка ыстатыйа таhааттарар эбит. Кэлин  «Бөлөхтөhүү» холкуос чилиэнэ буолбут. Сэрии сылларыгар фроҥҥа ыҥырыллан баран доруобуйатынан сыыйыллан үлэ фронугар анаммыт уонна 1943 сылтан Иркутскай уобаласка Мальта станцияҕа үлэлээбит. 1944 сыллаахха демобилизацияланан дойдутугар төннөн кэлэн Суоттуга ыскылаат сэбиэдиссэйинэн үлэлээбит. Кэргэннэммэтэх, эдэр сааhыгар ыалдьан өлбүт. Бииргэ төрөөбүттэрэ Саха АССР үтүөлээх учуутала  А.Н.Егорова уонна М.Н.Егорова.

11.Заболоцкая Елена Климентьевна.

12.Егоров Яков Яковлевич (1926-2000)

Байаҕантай улууhун II Байаҕантай нэhилиэгэр,  Тыраҕатталаахха төрөөбүт. Танда оскуолатыгар үөрэммит. Кэлин  «Тыраҕатталаах» холкуос чилиэнэ буолбут. Сэрии кэмигэр холкуоhугар биригэдьиирдээбит. Үлэ фронугар ыҥырыллан 1944 сылтан Сангаарга чох хостооhугар үлэлээбит. 1946 сыллаахха демобилизацияланан дойдутугар төннөн кэлэн «Тыраҕатталаах» холкуоска үлэлээбит. Кэлин Уус-Алдаҥҥа, Муомаҕа, Дьокуускай куоракка сэбиэсскэй-партийнай үлэҕэ сылдьыбыт. Тыыл, үлэ бэтэрээнэ, Уус-Алдан улууhун Бочуоттаах олохтооҕо. Кэргэнэ Нина  Ивановна Протопопова. Икки уоллаахтар.

13.Матвеев Петр Семенович (1923-1988).

Байаҕантай улууhун II Байаҕантай нэһилиэгэр, Булуҥ диэн алааска Маппыайаптар дьиэ кэргэттэригэр иккис оҕонон төрөөбүт. «Бөлөхтөһүү» холкуос чилиэнэ. 1944 сыллаахха үлэ фронугар ыҥырыллыбыт. Сангаарга чох хостооһунугар сылдьыбыт. Тыыл, үлэ бэтэрээнэ. 1941-1945 сс. Аҕа дойду сэриитин сылларыгар килбиэннээх үлэтин иһин», «Үлэ бэтэрээнэ» мэтээллэринэн наҕараадаламмыт. Кэргэнэ Алексеева Мария Константиновна 1929 сыллаахха Дүпсүн улууһугар төрөөбүт, эрдэ тулаайах хаалан  үөрэммэтэх. Бороҕоҥҥо кирпииччэ собуотугар үлэлии сылдьан П.С.Матвеевтыын ыал буолбуттар. «Ийэ албан аата» II III  истиэпэннээх уордьанынан наҕараадаламмыт. Аҕыс оҕолоохтор, элбэх сиэннээхтэр, хос сиэннээхтэр.

14.Неустроев Михаил Федотович.

Байаҕантай улууhун II Байаҕантай нэһилиэгэр төрөөбүт. “Бөлөхтөһүү” холкуос чилиэнэ. Кэргэнэ Анна Ивановна Бээрийэ Жирковтарыттан төрүттээх. Сэрии сылларыгар Сангаарга чох хостооһунугар сылдьан шахта сиҥниитигэр оһоллонон дойдутугар төннөн кэлбит. 1961 сыллаахха аҕыс уонугар чугаһаан иһэн өлбүт. Уола Неустроев Алексей Михайлович-Нооно үс оҕоломмута, эдэр сааһыгар өлбүтэ.

14.Саввин Максим Петрович (1894-1980). Таатта улууһугар Байаҕантай нэһилиэгэр төрөөбүт. Тулаайах буоланнар быраатын Өлөксөйү, балтын Дэбдэни кытары IIБайаҕантайга көһөн кэлбиттэр. Максим Петрович барыга дьоҕурдаах буолан, холкуос төһүү үлэһитэ, ударнига, онтон стахановеһа буолбут. Сэрии сылларыгар Мальта станцияҕа болуотунньугунан үлэлээбит. 1930 сыллаахха Колодезникова Акулина Петровналыын (1907-1983) ыал буолбуттар. Алта оҕолоруттан элбэх сиэннээхтэр, хос сиэннээхтэр

16.Софронова Устинья Константиновна (1923-1992).

Байаҕантай улууhун II Байаҕантай нэhилиэгэр  Тандагы  үрэҕэр төрөөбүт. «Пятилетка» холкуос чилиэнэ. Сэрии сылларыгар үлэ фронугар анаммыт уонна 1942 сылтан  Алдаҥҥа мас кэрдиитигэр, кэлин балык бултуур биригээдэҕэ үлэлээбит. 1946 сыллаахха  дойдутугар төннөн кэлэн «Пятилекка» холкуоска үлэлээбит. Кэлин «Бөлөхтөhүү» холкуос чилиэнэ буолбут.  Биир оҕолоох, сиэннэрдээх, хос сиэннэрдээх.

17.Турантаев Иван Тимофеевич- (1893-1943).

Байаҕантай улууhун II Байаҕантай нэhилиэгэр,  Табы диэн алааска, төрөөбүт. Халыма үрэҕэр оттуу сылдьан от ыйын 2 күнүгэр  1942 сыллаахха үлэ фронугар барбыт. Сангаарга чох хостооһунугар сылдьан 1943 сыллаахха шахта сиҥниитигэр өлбүт. Кэргэнэ Кривошапкина Гликория Алексеевна. Икки кыыс, биир уол оҕолоох.

Сэрии кэнниттэн дойдуну чөлүгэр түһэриигэ үлэ фронугар сылдьыбыттар

 1.Атласов Семен Никифорович

Байаҕантай улууhун Хаҥалас нэhилиэгэр,  Хаптаанньа үрэҕэр, Чучукка төрөөбүт. «Пятилетка» холкуос чилиэнэ. Сэрии кэнниттэн, 1945 сыллаахха, үлэ фронугар ыҥырыллыбыт. Онтон дойдутугар төннөн кэлэн «Пятилекка», «Бөлөхтөhүү» холкуостарга, бөдөҥсүйбүт Партизан Егоров аатынан холкуоска, онтон Герой Егоров аатынан сопхуоска сүөhү иитиитигэр үлэлээбит. Кэргэнэ Колодезникова Прасковья Николаевна, Үс кыытаах, сиэннэрдээх, хос сиэннэрдээх.

 2.Матвеева Акулина Семеновна.

Байаҕантай улууhун II Байаҕантай нэhилиэгэр, Орто сайылыкка төрөөбүт. «Бөлөхтөhүү» холкуос чилиэнэ. Сэрии кэнниттэн, 1946 сыллаахха, үлэ фронугар ыҥырыллыбыт. Дойдутугар төннөн «Бөлөхтөhүү», Партизан Егоров аатынан холкуостарга сүөhү үлэтигэр үлэлээбит. Кэлин бөдөҥсүтүү кэмигэр Хаҥалас оройуонугар көспүт, кэргэннээх, оҕолордоох.

 3.Колодезникова Прасковья Николаевна.

Байаҕантай улууhун II Байаҕантай нэhилиэгэр, Мэндиэрэ диэн алааска төрөөбүт. «Бөлөхтөhүү» холкуос чилиэнэ. Сэрии кэнниттэн, 1946 сыллаахха, үлэ фронугар ыҥырыллыбыт. Онтон дойдутугар төннөн кэлэн «Бөлөхтөhүү», Партизан Егоров аатынан холкуостарга сүөhү иитиитигэр үлэлээбит.  Кэргэнэ Атласов Семен Никифорович, үс кыыстаахтар, олортон элбэх сиэннээхтэр, хос сиэннээхтэр.