Арыылаахха Кыайыы 80 сылын көрсө

Тиит-Арыы бөһүөлэгин 2 Байаҕантай нэһилиэгин  дьоно-сэргэтэ, биир дойдулаахтарбыт, Тандаҕа олорооччулар 2 Байаҕантайдар "Бэтилиэккэ" холкуос сэриигэ барбыт буойуттарбытыгар, ааттарын үйэтитэн ыам ыйын 2 күнүгэр  2 Байаҕантай нэһилиэгин баһылыга Егоров Андрей Васильевич  тэрийиитинэн 34 киһи араас техникэнэн  баран кэллибит.

Кыайыы 50 сылыгар биир дойдулаахпыт  Ховров Михаил Александрович көҕүлээһининэн  Тандаҕа олорор 2 Байаҕантайтан төрүттээх биир дойдулаахтарбытын мунньан  пааматынньык  туруоруллубута. Сэриигэ  "Бэтилиэккэ"  холкуос буойуттарын ааттара суруллан, бастакы хардыы оҥоһуллубута. Салайаччы  Ховров Михаил Александрович ,  Софронов Иннокентий Васильевич ,Матвеев Гаврил Петрович   Петр Петрович Находкин ,Гаврил Иннокентьевич Аргунов  дьону  түмэн, урукку Бэтилиэккэ холкуос сиригэр Арыылаах алааска "Кыайыы 50 сыла" өйдөбүнньүгү оҥорбуттара.  Кыайыы 60 сылыгар "Кыайыыны уһансыбыттара" диэн үлэ фронугар сэрии ыар сылыгар үлээбит ийэлэрин, аҕаларын, хорсун-хоодуот дьоннор ааттара суруллубута. Кыайыы 65 сылыгар өйдүү-саныы сылдьыаҕын диэн  анаан биир дойдулаахтарыгар маһынан  " Сэргэ" туруорбуттара.

Онтон Кыайыы 70 сылыгар  Бэтилиэккэ  холкуос  Аҕа дойду Улуу сэриитин бириэмэтигэр бэрэссэдээтэллээбит дьоннорбутугар кинилэр  сырдык мөссүөнэрин  оҕолоро, аймахтара туруорбуттара.1941-42 сс -Готовцев Егор Егорович ,1942-44сс Аргунов Иннокентий Иванович ,1944-1949сс Находкин  Петр  Романович бэрэссэдээтэлинэн үтүө суобастаахтык үлэлээбиттэрэ.

Кыайыы 75 сылыгар "Бэтилиэккэ" холкуос дьоно , саха дьонун сиэринэн сыспай  сиэллэрин , сылгыны  өрө туталлара. Ааһан иһэр айанньыттар аттарын баайан, бу кэриэстэбил сиргэ тохтуур буоллунар диэн өйдөбүл  бэлиэни оҥорбуттара.

Кыайыы 80 сылыгар  бу пааматынньыктары  күрүөтүн  саҥалыы оҥордулар.

2 Байаҕантайдар Кыайыы 80  сылыгар Байаҕантайдар "Бэтилиэккэттэн" төрүттээхтэр тахсыахтара диэн саҥа остуол оҥоһулунна.

Бу манна мустубут дьон Улуу Кыайыыны уруйдаан ,Улуу Кыайыыга сырдык тыыннарын толук уурбут бары буойуттарбытын ,эргиллэн кэлэн дойдубут сайдыытын туһугар турууласпыт дьоннорбутун ,Улэ фронугар ,промышленноска үлэлээбит биир дойдулаахтарбытын ахтан -санаан итии чэйдээх остуол тула кэпсэттибит.И.С.Колодезников аатынан Тиит-Арыы оскуолатын үөрэнээччилэрэ эһэлэрин ,эбэлэрин ,онтон 2 кылаас үөрэнээччитэ Андриан Тарабукин эһэтин сэрии ветерана Тарабукин М.М. туһунан кэпсээтэ. 

Умнумуоҕун өйдүү-саныы сылдьыаҕын, Кыайыыны уһансыбыт буойуттарбытын!