Айан аргыстаах,

                        аартык алгыстаах.

Ханнык баҕарар нэһилиэккэ, улууска тиийдэххинэ, аан бастаан киирии аартыкка киһи хараҕа быраҕыллар.

Тиит -Арыы бөһүөлэгин, 2 Байаҕантай   нэһилиэгэр, нэһилиэк олохтоохторун бэйэ көҕүлээһинин  өйүүр программатынан (ППМИ) ,сырдык санаанан салайтаран бөһүөлэккэ киирии сыырга Айан аартыга ааркатын балаҕан ыйын 11 күнүгэр ,2025  сыллаахха үрдүк көтөҕүллүүлээхтик , үөрүүлээх быһыыга -майгыга алгыс тылынан арыалланан арылынна .

Нэһилиэк дьаһалтата ,баһылык Андрей Васильевич Егоров  7 сыл устата ылсан  тохтообокко бөһүөлэк сайдыытыгар,суол оҥоһуутугар , бу проекка  уонна да атын өрүттээх үлэлэргэ  Тиит-Арыы сайдарын туһугар  былааннаахтык үлэлээн кэллилэр.

Айан Аартыгын арыллыытыгар  күн да үтүөтэ, оҕо- аймах  нэһилиэк Ытык кырдьаҕастара, олохтоохторо, ыалдьыттар мунньустан аркабыт аһыллыыта көхтөөхтүк ыытылынна.

Бу үөрүүлээх куҥҥэ алгыһы 2 Байаҕантайтан төрүттээх алгысчыт Аргунов Айаал Гаврильевич дойдутун иччитин аал уотун арыылаах алаадьынан күндүлээн , сылгы сиэлинэн сыт таһааран, сирин-дойдутун кыынньыбыт быыппаҕынан аһатан, алгыһын тиэртэ.

Саха Республикатын Ил Түмэн судаарыстыбаннай  мунньаҕын депутата Геннадий Анатольевич Васильев, 2 Байаҕантай  тыа сирин түөлбэтин баһылыгар кандидат Егоров Андрей Васильевич, нэһилиэк Ытык кырдьаҕаһа, нэһилиэк историятын  үөрэппит, 2 Байаҕантай историятын чинчийэн үөрэппит ,кыраайы үөрэтээччи Александр Иванович Турантаев күн күбэй ийэтэ Турантаева Анна Александровна ,Айан Ааркатын аалай кыһыл лентатын үөрэн-көтөн быстылар.

Бу сиэдэрэй оҥоһуулаах , сахалыы тыыннаах тутууну ,2 Байаҕантай нэһилиэгин  дьаһалтата, «Рим» Генеральнай директора Копырин П.И. кытта дуогабар уурсан, «Бэйэ көҕүлээһинин өйүүр  программатыгар «(ППМИ) киирэн Аарка үлэтин оҥорон бүтэрдэ. Бу проекка үлэлэспит,көмөлөспүт "Рим" тэрилтэ үлэһиттэригэр , бар дьоммутугар барҕа махтал тылларын  эттибит,   Махтал суруктар  туттарылыннар.

Саха Республикатын Ил Түмэн депутата Геннадий Анатольевич Васильев   Уус Алдан улууһун мунньаҕын бэрэсэдээтэлэ Иннокентий Иннокентьевич Аммосов ,Александр Иванович Турантаев аатынан библиотека сэбидиссэйэ Матрена Григорьевна Аргунова эҕэрдэ тыллары,  Тиит-Арыы диэн  эриэккэс уоттаах-күөстээх оҥоһугун иннигэр сайдыыга туһуламмыт тыллары эттилэр. 

 Историяны сэгэтэн көрдөххө, бу аартыгынан  Улуу Кыайыыны уруйдаан буойуттарбыт кэлбиттэрэ.1945 с Тиит -Арыы нэьилиэгэр Кыайыы ыһыаҕа бу аартык анныгар буолбута . Онтон биһиги Аҕа дойду Улуу сэриитигэр сылдьыбыт Кыайыыны уһансыбыт буойуттарбытын ,тыылга ,үлэ фронугар үлэлээбит биир дойдулаахтарбытын чиэстээммит ,өрөгөйдөөх  Улуу Кыайыы 80 сылыгар  «Ураа» хаһыынан олохтоохтор, кэлбит  ыалдьыттар дуораччы хаһыытаан ,уруйдаатыбыт ,айхаллаатыбыт.

Бары билэбит бу  суолунан Тиит Арыы бөһүөлэгин сайдарын туһугар сахалар тумус туттар киһибит ,киэн туттан ааттыыр- Саха Республикатын бастакы Президенэ  Михаил Ефимович Николаев нэһилиэк статуһун биэрэн, сайдыы суолун тумнубакка,  биһиги  нэһилиэкпит  сайдарын туһугар элбэх кылаатын ,күүһүн уурбутун ахтан-санаан ,махтанан аастыбыт.

Инникитин даҕаны бу  Алгыстаах айан Ааркатын иһинэн сайдыы суолун саҕан ,кэскиллээх олоҕу аҕала турдун диэн баҕа санаалаах, ыраас иэйиилээх инники сайдыы барарын туһугар , олохтоохтор хаартыскаҕа үөрэ-көтө көрсөн, түһэн, күө-дьаа тарҕастыбыт.

Тиит-Арыылар нэһилиэктэрин киэргэтэр биир бастыҥ, үйэлээх тутуу оҥоһуллубутунан киэн тутталлар,  дойдуларын көстүүтэ киэркэйэрин туһугар элбэх үлэ ыытылла турарыттан үөрэллэр, астыналлар.

 Үйэлээх, дьоһун тутуулаах Алгыстаах Аартык  ыраахтан-чугастан айанныыр дьону арчылыы, алгыы туруо.